Zur letzten Glosse von Sepp Grantlhuber ging folgender Leserbrief von MdL Max Weichenrieder ein:
Liaba Grantlhuber, mid deim letzten grantln über den Bsuach von de CSUler im Eschelbecka Zeltlager host füa mi a bisserl zwenig rescherschiert.
Woast Grantlhuber, wennst mi gfragt häst, nachad häd i da sogn kenna, dass der Bsuach vom Sigi Schneider mit de Verantwortlichen vom Pfahofara Kreisjugendring vorher fei scho abgschprocha war.
Nachad häd i da a sagn kenna, dass da Vorsitzende vom Kreisjugendring – natürlich a mit a Krawattn – mid no einige Verantwortliche und Betreuer scho auf uns gwart hod obm bei de Gebäude vom Kreisjugendring.
Na häd i da a sagn kenna, dass i ned zum ersten Moi auf dem Zeltlagerplatz war, sondern beim Bau von da erste Hüttn scho mit dabei war. Damals war i nämle in da Vorstandschaft vom KJR und bei de Skifreizeiten als Betreuer dabei.
Außadem schreibt uns Abgeordnete da Bayerische Jugendring alle Jahr oh, ob mia ned irgendwo in unsara Nachbarschaft vorbeikemma meng. Und wenn ma nachad kemma, dann sogst du, dass des nur Woikampf is. Aba stell dir vor, mia Politiker dan so was ned macha. Üba wos dadsd nacha du grantln
Vielleicht is des ganze aber a bloß inszeniert und de Deandl, de wo den Lesabriaf gschriem ham, de ham den garnet wirkle selber gschriem. Weil de ham ja gwusst, dass mia kemma.
Jetz frag i mi, ob da ned wea anders dahintersteckt. Denn do hod se no oana beschwert, weil mia eam ned gfragt ham, ob mia da nauf deafa zu de Kinder, obwoi der Platz gar ned dem Landkreis ghört, sondern dem Kreisjugendring.
Weil, liaba Grantlhuber, wenn des a so war, dann foid des unter die Rubrik "Lasst uns doch noch einmal lügen" oder wia zu mia a bekannter Woizara amoi gsagt hod: "Ned ois gsagt is no lang ned glong". Aba, wia gsagt, bloß wenn des so war.
Oiso na liaba Grantlhuber, frog mi des nächste moi wennst wida was üba mi oder uns schreibst.
Deine Leser meng doch gwieß wissn wia des wirkle war. Nix füa unguad und lass de freindle griaßn.
Vielleicht dring ma a Maß midanand aufm Volksfest, nacha kemma uns ausgrantln.
Da Max von da CSU
